I Proverbi
Venivano pronunciati sempre a proposito, se ne faceva un uso indiscriminato consci che “i proverbi sono la saggezza dei popoli”.
Ce n’era sempre uno collegato con una circostanza:
La femmina si canosci alla lengua e lu bovi alli corni;
L’amori no si ccatta allu marcatu;
La campagna ti stampagna;
Ronca ti Brindisi e zappa ti Misciagni;
Ci vuè viti lu riccu ‘mpuviriri, manda la genti fori e non ci sciri;
La furtuna cu ti vascia, ca lu sapiri picca ti giova;
A casa brusciata mittinci fuecu;
Lu sparagnu è mienzu guadagnu;
La vintura e la svintura no sempri dura;
Lu pacciu mena e lu saputu cogghi;
A casa ti latri non ci sciri a rubbari;
Quandu ti truevi allu ballu, bisogna cu balli;
A ci è prima macina;
Batti lu fierru quandu è cautu;
Ci fabbrica e sfabbrica non perdi mai tiempu;
Sott’all’acqua fami, sott’alla nevi pani;
Fatia e fatia e la sera pani e cipodda;
E’ megghiu malatu ca muertu;
Alli matrimoni e alli muerti si canoscunu li parienti;
Pisa giustu e vindi caru;
Lu saccu taccatu, no si sapi cce porta;
Addò no ssi chiamatu, comu ciucciu si trattatu;
Avuta la grazia, iabbatu lu Santu;
L’omu no si misura a parmi;
Cani ca bbaia no mozzica;
Puru lu previti sbaglia sobbra a l’artari;
Picca mangiari e picca parlari, no faci mai mali;
A buenu cavaddu no manca sella;
Lu bovi teni la lengua e no po parlari;
Foi la riggina ed ebbi bisuegnu ti la vicina;
Cu lu picca si campa, cu lu nienti si mori;
Amici e cumpari si parla chiari;
Si canosci prima nu busciardu di nu zueppu;
Lu difficili non eti cu cati a mari, ma cu ti ‘ndissi;
Ci paia annati è mali sirvutu;
A ci no voli, li uecchi di fori.

RICAPITOLANDO. . . in rima
Ricapitolando, proponiamo qui di seguito la poesia dialettale <<‘NCERA NA VOTA......BRINDISI>> composta dall’avvocato Ennio Masiello, valente e poliedrico professionista, brindisino appassionato, eccellente poeta vernacolo.
La magistrale poesia, in otto quartine, mette mirabilmente in evidenza, in versi, tutto quanto fin qui è stato scritto e trattato:

Ncera na vota. . . nc’era nu paisi
ma nu paisi fattu pi vìteri,
na chicchira, nu culu ti bicchieri,
pizzenti sì, ca no tinia turnisi,

però tinia nu mari ‘mprufumatu
ca ti ‘ndurava t’alica e di scuegghiu
e nu cielu ti stelli ‘mbrillantatu
ca no nci ndè allu mundu n’atru megghiu.

Allu Casali tuttu nu sciardinu
t’arvuli vierdi e fiuri colorati,
cu tre quattru casoddi e nu villunu
a mienzu comu pecuri spatriati.

Vita senza pinzieri, scuscitata,
pircè ndi cuntintammu ti lu nienti:
la giacca ‘rrivutata ti lu tata,
Sant’Antueni e la focra ti sarmienti,

la Mellonata a Santa Pulinari,
pettuli, purcidduzzi, ‘ncacciddati;
la vindegna ‘ndurava pi li strati
e Sanghiatoru nuestru scìa pi mari.

Genti senza malizia, alla ‘bbunata:
Rutu Rutu, Pea Pea, Trapulanella,
la Cicurara cu la rumanella,
Roccu Piccioni cu la cremolata,

carosi ca tuzzàunu cu li nuci,
vecchi allu friscu cu li siggiteddi,
vagnuni ca sciucaunu a “fuci fuci
manueli” e ti pariunu rundineddi.

Ddi tiempi comu parunu luntani,
lu cori mia nci penza e si ‘rrivota:
atru mundu, atra vita, atri cristiani.
Brindisi no nc’ è cchiù !. . . Nc’era na vota.

                                                                       Ennio Masiello